ԵԱՏՄ մաքսային օրենսգիրք
Հոդված 377։ Մաքսային մարմինների կողմից ռիսկերի կառավարման գործընթացի կազմակերպումը
1. Մաքսային մարմինների կողմից ռիսկերի կառավարման գործընթացը ներառում է՝
1) մաքսային հսկողության օբյեկտների, իրականացված մաքսային գործառնությունների և ինչպես ապրանքների բացթողումից առաջ, այնպես էլ հետո անցկացված մաքսային հսկողության արդյունքների մասին տեղեկատվության հավաքումը և մշակումը.
2) ռիսկի գնահատումը.
3) ռիսկի ցուցիչի նկարագրումը.
4) ռիսկերի նվազեցմանն ուղղված միջոցների և այդ միջոցների կիրառման կարգի սահմանումը.
5) ռիսկերի պրոֆիլների մշակումը և հաստատումը.
6) մաքսային հսկողության օբյեկտների ընտրությունը.
7) ռիսկերի նվազեցմանն ուղղված միջոցների կիրառումը.
8) ռիսկերի նվազեցմանն ուղղված միջոցների կիրառման արդյունքների վերլուծությունը և հսկողությունը:
2. Ռիսկերի նվազեցմանն ուղղված միջոցների տարբերակված կիրառման նպատակներով մաքսային մարմինները կարող են իրականացնել մաքսային գործառնություններ կատարող անձանց դասակարգում ըստ կատեգորիաների՝ դրանք ռիսկի մակարդակի ցածր, միջին կամ բարձր կատեգորիաների թվին դասելու միջոցով:
3. Ռիսկերի կառավարման գործընթացի իրականացման ժամանակ մաքսային մարմիններն առավելապես օգտագործում են տեղեկատվական համակարգերը և տեղեկատվական տեխնոլոգիաները:
4. Մաքսային մարմինների կողմից ռիսկերի կառավարման գործընթացն իրականացվում է անդամ պետությունների՝ մաքսային կարգավորման վերաբերյալ օրենսդրությանը համապատասխան:
5. Ռիսկերի պրոֆիլներում ու ցուցիչներում պարունակվող տեղեկատվությունը գաղտնի է և ենթակա չէ հրապարակման՝ բացառությամբ անդամ պետությունների օրենսդրությամբ սահմանվող դեպքերի:
6. Հանձնաժողովն իրավունք ունի սահմանելու ռիսկերի այն ոլորտները, որոնց նկատմամբ մաքսային մարմիններին հանձնարարվում է հաստատել ռիսկերի պրոֆիլը և ռիսկերի նվազեցմանն ուղղված միջոցներ կիրառել: